Трејси Елис Рос глуми пејачка ѕвезда во новиот филм „Висока нота“ (The High Note), но вели дека темата не е поврзана со нејзината славна мајка Дајана Рос.
„Разбирам зошто сите се прашуваат тоа. Но, одговорот е не, не ја глумам мојата мајка“, изјави таа во едно интервју.
Филмот, кој ќе излезе на платформите за домашно кино в петок, ѝ ја дава долгоочекуваната шанса да пее на филмското платно.
„Тоа е нешто што отсекогаш сум го сакала. Тоа е еден од моите детски соништа, но моите најголеми соништа станаа едни од најголемите стравови. Можете да го разберете тој страв знаејќи која ми е мајка“, рече 47-годишната Трејси Елис Рос.
Дајана Рос (76 години) стекна светска слава во 1960-ите како вокал на „Сјупримс“, една од најпопуларните женски групи во историјата, а подоцна имаше и успешна соло кариера.
