Во Домот на културата „Билјана Беличанец“ во Скопје денеска (17 октомври) во 18 часот ќе се одржи премиерата на документарниот филм „Последниот каубој“, чиј режисер и сценарист е Тадеј Чатер од Словенија. Премиерата е дел од деветтото издание на Меѓународниот филмски фестивал Киненова.
Филмот, кој е продукција на „Круг филм“ од Скопје, ја раскажува приказната за Хари Џексон, вечниот трагач по правдината и вистината и обожавател на вестерн филмови од БиХ, кој се осмелил да го живее животот како филмски лик.
Тадеј Чатер (1967) е словенечки сценарист и режисер, а работел и како новинар, колумнист и уредник во медиуми.
Од Македонија, во правењето на филмот учествуваше Дејан Смилевски како монтажер, а Дејан Крајчевски од „Круг филм“ е еден од продуцентите.
