ДВОЕЦОТ ОД „БЕРНАЈС ПРОПАГАНДА“ МУ ОДДАВА ПОЧИТ НА ЕДЕН ОД СВОИТЕ МУЗИЧКИ ИДОЛИ СО МИНИАЛБУМ

Скопје, (СМАРТ СДК.МК)

„Шарла рекордс“ го објави своето 16. издание како специјален проект на клучните членови на бендот „Бернајс пропаганда“, Кристина Горовска на вокал и Васко Атанасоски на гитара.

Во паузата меѓу два албума на нивниот матичен бенд, овој креативно-љубовен тандем создаде минииздание од две песни, од кои едната („Во ладна соба”) е посвета на неодамна починатиот американски музичар Грент Харт, а втората е авторска песна на Атанасоски.

Горовска и Атанасоски го истакнуваат делото на Грент Харт, тапанарот на култниот бенд „Хускер ду“, како голема инспирација и музичко влијание уште од нивните почетоци и со годините, тој однос се преточил во пријателство при неговите концертни посети во Скопје. Затоа и последниот поздрав до Харт е обработка на неговата песна од 1999 година, „Во студена куќа“, со адаптиран текст, потпишан од Кристина Горовска.

„Кристина Горовска и Васко Атанасоски – Во ладна соба ЕП“ е заедничко издание на „Шарла рекордс“ и на „Балкан велики“.