Најголемите К-поп продуценти во Јужна Кореја ќе се здружат за да организираат музички фестивал кој би можел да ги обедини најголемите ѕвезди од музичката индустрија, што некои локални медиуми го нарекоа корејска верзија на американскиот фестивал Коачела.
Четири издавачки куќи изјавија дека планираат формирање на заедничка компанија за развој на „Фаноменон“ (Fanomenon), голем фестивал насочен кон претставување на корејската популарна култура пред светската публика. Разговорите го вклучуваат и владиниот Комитет за размена на популарна култура, додека компаниите бараат нови начини за проширување на глобалното влијание на K-попот.
Според Парк Џин-јоунг, кој е копретседавач на Комитетот, фестивалот би можел да започне најрано во 2027 во Јужна Кореја, по што би следеле изданија во странство од 2028.
(Фото: Индипендент)
