Дваесет и три поп и рок хитови од 1980-тите и 1990-тие години, беа годинашен избор на Македонската опера и балет (МОБ), за традиционалниот Василичарски концерт. Праксата од изминативе години, да се подготви нешто поинакво за еден од омилените концерти на македонската публика, продолжи и годинава со темата „Едноставно најдобрите“.
Хитови како „Хотел Калифорнија“, „Слобода“, „Водолија“, „Црно кадифе“, „Послушај го срцето“, „Леди Мармелајд“, во одлично спакуваните аранжмани на Дамир Имери, Сашко Николовски и Владимир Димовски, под диригентство на Бисера Чадловска ги изведоа 14 пејачи : Александар Тарабунов, Елена Петреска, Ана Мицковска, Александра Јанева, Горан Наумовски, Ѓоко Танески, Арбен Бени Шаќири, Дани Димитровска, Наташа Малинкова, Лена Заткоска, Даниел Дан и гостинот од Хрватска Бојан Јамброшиќ, како и оперските солисти Наде Талевска и Ѓорѓи Цуцковски.
На крај сите заедно ја испеаја „Едноставно најдобри“.
Весело, романтично, забавно, со одлично осветлување и озвучување беше на концертот во полниот салон со публика од повеќе генерации. Носталгични за овие безвременски хитови, гостите се забавуваа со ракоплескања во ритам на музиката и со потпевнување.
Голем аплауз доби и бендот на сцена со Александар Поп Христов на гитара, Имери и Николовски на клавијатури и Гоце Стевковски на тапани.
Поради големиот интерес, МОБ закажа уште два Василичарски концерти, за денес и за утре.
Б. НЕСТОРОСКА
