Од 15 до 17 мај, во малата сала на Филхармонијата и во Музејот на Град Скопје ќе се одржи Скопски градски фестивал.
Првата вечер е посветена на соработката помеѓу хрватската издавачка куќа „Кроација рекордс“ и македонски музичари. Заеднички концерт ќе одржат Иван Кукиќ (фото), Мухамед Ибрахими и „Код 369“.
„Оваа издавачка куќа е докажан поддржувач на македонската музика преку издавање албуми на наши музичари“, велат од „Баги комуникации“, кои се организатори на фестивалот.
На 16 мај е концерт на грчкиот состав „Хјуман тач“ и македонскиот контрабасист Мартин Ѓаконовски, кој ќе настапи со германскиот пијанист Роман Бабик.
На 17 мај во Музејот на Град Скопје ќе се одржи настанот „Денови на Словенија“. Притоа ќе се промовира книгата „Се отвори небото, песни за Магда“ на поранешниот словенечки амбасадор во Македонија, Милан Јазбец и ќе се отвори изложбата „Хималаи и словенечките планини во слика и со збор“ на Магда Шаламон. Истата вечер е концертот на „Дупљак вилиџ оркестра“ со традиционална словенечка музика во современ аранжман, а ќе настапи и квартетот на Тања Сонц, една од најпознатите словенечки виолинистки.
Билетите се продаваат преку мрежата на „МК тикетс“.
