Здравко Чолиќ ќе одржи трет концерт со симфониски оркестар во Скопје, на 21 март во салата „Јане Сандански“, откако се распродадоа двата на 18 и на 19 март, објави организаторот „МК тикетс“.
Ова ќе биде негов прв настап во Скопје по шест години пауза, овојпат со симфониски оркестар, составен од 50 музичари од Биг бендот од Нови Сад и од оркестарот на Операта на Српскиот народен театар од Нови Сад. Новите аранжмани на неговите хитови прилагодени за оркестар ги подготви диригентот Федор Вртачник.
„Моите пријатели и соработници со години ме убедуваа да направиме репертоар и концерт во придружба на голем оркестар. На иницијатива на славниот диригент Федор Вртачник го покренавме целиот проект. Целосно му препуштив да ги одбере песните кои ќе добијат ново руво и звук, соодветни за оваа ексклузивна музичка приказна“, кажа Чолиќ.
Салата „Јане Сандански“ ќе биде исклучиво со места за седење.
