Македонската фудбалска репрезентација денеска останува без својата икона откако Горан Пандев објави дека мечот со Холандија на Европското првенство ќе му биде последен во националниот дрес. Не е првпат Пандев да најави повлекување од репрезентацијата, но сега на прагот на 38. година од животот и со исполнетиот сон да заигра на едно големо натпреварување, се чини дека одлуката е конечна.
Пандев вели дека ја остава репрезентацијата во сигурни раце, додека неговото место во македонскиот фудбалски фолклор е засекогаш осигурано.
- Пандев имаше 18 години кога дебитираше за репрезентацијата на 6 јуни 2001 во Анкара, против Турција во квалификациите за Светското првенство 2002 во Јапонија и Јужна Кореја (3:3). Селекторот Ѓоре Јовановски го пушти во игра во 66. минута на местото на Арџент Беќири.
- Првиот гол го постигна на 21 август истата година, на пријателската средба со Малта во Скопје (5:0).
- Со двата гола против Шпанија во август 2009 го надмина Ѓорѓи Христов (16) и стана најдобриот стрелец во историјата на репрезентацијата.
- Најефикасната година му беше 2009, кога на 10 натпревари постигна осум гола.
- Пандев направи пауза од националниот тим во 2014 и 2015 година, по што се врати на наговор на тогашниот нов селектор Игор Ангеловски.
- На 12 ноември 2020, Македонија обезбеди пласман на ЕП откако Пандев го постигна единствениот гол против Ерменија во финалето на баражот на Лигата на нации.
- Тој уште еднаш се запиша во историјата на македонскиот фудбал кога против Австрија го даде првиот гол за Македонија на европските првенства.
- Во пресрет на денешниот дуел со Холандија, Пандев е на 121 настап и 38 голови за репрезентацијата, рекорд во двете категории.
