Легендарниот фронтмен на „Ајрон мејдн“ Брус Дикинсон објави дека по речиси 30 години брак се разделил од сопругата Педи. Тој вели дека засега не планираат развод, што би значело и правна битка за неговото богатство од 90 милиони фунти, јавуваат британските медиуми.
Шеесет и едногодишниот Дикинсон во меѓувреме се преселил во Париз, во домот на неговата нова, 15 години помлада девојка, која е инструкторка по фитнес и голем фан на „Ајрон мејдн“.
„Леана отсекогаш била голем фан на групата и ја следеше во последните десет години. Таа и Брус станаа навистина блиски во изминатата година и таа веќе ги запознала неговите деца“, кажа еден извор за весникот „Мирор“.
Дикинсон, кој пред три години се лекуваше од рак на јазик, и Педи се венчаа пред 29 години и заедно имаат три деца.
