Драмски театар Скопје вечерва (23 април) гостува во Тиват, Црна Гора,.со претставата „Болва в уво“, во режија на Синиша Евтимов. Претставата ќе се игра како дел од регионалниот театарски фестивал РУТА. На репертоарот се шест наградувани претстави од современата регионална продукција.
Претставата „Болва в уво“ е работена по најпознатиот текст на францускиот драмски писател Жорж Фејдо, напишан во 1907. Во Драмски театар првпат е поставена во 1970-тите и имала 456 изведби. Постановката на Евтимов ја имаше премиерата на 17 декември и досега се играше 12 пати.
На претставата работеа сценографот Мартин Манев и костимографот Раде Василев, а улогите ги играат Дениз Абдула, Ања Митиќ, Марјан Наумов, Лазар Христов, Игор Стојчевски, Стефан Вујисиќ, Нина Елзесер, Владимир Петровиќ, Рубенс Муратовски, Катерина Шехтанска, Томислав Давидовски, Јована Спасиќ, Петар Стојковиќ и Ивана Павлаковиќ.
