„Лексус“ пристигна на Автосаемот во Токио, што официјално се отвора утре, со својата визија за електричен автомобил на иднината преточена во моделот „ЛФ-30“. Првиот електричен „лексус“ доаѓа наредниот месец, а потоа електрификацијата ќе ја опфати целата понуда.
Дизајнерите си дадоа голема слобода при обликувањето на „ЛФ-30“, давајќи му голем панорамски покрив што се прелева во ветробранско стакло и врати што се отвораат како крилја.
Иако не изгледа голем на прв поглед, „ЛФ-30“ е долг нешто повеќе од пет метри и тежи 2.400 килограми, а го придвижува пакет од четири електрични мотори, по еден во секое тркало. Тие заедно развиваат 536 коњски сили, овозможувајќи забрзување до 100 километри на час за 3,8 секунди и максимална брзина од 200 км/час. Со едно полнење, тој наводно може да помине до 500 километри.
Замислен за 2030 година, „ЛФ-30“ треба да има и функција на автономно возење, но компанијата не даде детали за тоа, а посебен футуристички шмек му дава „Lexus Airporter“, дрон технологија, која, на пример, ќе може да го земе багажот и да го смести во автомобилот.
