Египетските власти отворија реновирана древна променада во градот Луксор која датира од пред 3.000 години, последниот владин проект со кој се нагласуваат археолошките богатства на земјата. Блескавата церемонија наликуваше на древна процесија во која учествуваа стотици изведувачи на кочии, облечени во носии од ерата на Новото кралство.
Египет се мачи да ја заживее својата туристичка индустрија која беше погодена од години политичка нестабилност откако во 2011 од власт беше соборен долгогодишниот лидер Хосни Мубарак.
Древниот пат, познат и како Авенија на сфингите, ги поврзувал славните храмови Карнак и Луксор во она што некогаш бил градот Теба. Се верува дека по тој пат оделе аџиите за да ги посетат храмовите и да им оддадат почит на боговите.
Патот долг 2,7 километри, покрај кој се наредени стотици статуи, беше предмет на археолошки истражувања откако беше откриен во 1949 година. Според министерот за туризам и антиквитети Халед ал-Енани, досега се откриени околу една третина од статуите.
Еден од водечките египетски археолози Мохамед Абд ел-Бадеи вели дека најстарите руини долж патот се шест структури изградени од кралицата Хатшепсут околу 1400 година пред нашата ера.
