Ѕвездата на „Игра на тронови“, Питер Динклиџ, ја игра главната улога во мјузиклот „Сирано“, новата филмска адаптација на францускиот класик, кој вчера имаше премиера во Велика Британија.
Адаптацијата е правена според театарската продукција од 2008 што ја напиша неговата сопруга Ерика Шмит, во која исто така играше Динклиџ. Главната промена што Шмит ја направи во однос на оригиналот, напишан од Едмонд Ростан во 1897, е што на главниот лик му го отстрани препознатливиот голем нос.
Динклиџ вели дека оваа промена била еден од неколкуте елементи кои го привлекле кон улогата.
„Голем дел од приказната е за човек кој е несигурен во себеси поради носот. И кога ќе го отстраните тоа, приказната станува поуниверзална, оти секој може да се пронајде во неа“, вели американскиот глумец.
„Чувствував дека е важно да се раскаже приказна за човечката поврзаност во свет во кој сѐ повеќе и повеќе се исклучуваме. И тогаш се случи пандемијата и ние станавме уште повеќе исклучени. Затоа беше вистинско време да се раскаже оваа приказна“, изјави режисерот Џо Рајт, кој го сними „Гордост и предрасуди“.
