Се радувам што ќе пеам пред млада публика во Штип, вели Драган Мијалковски пред настапот на Д фестивал, кој ја промени својата досегашна дојранска локација и ќе се одржи од 4 до 6 јули на стадионот во Штип. Мијалковски ќе настапи со Битолскиот камерен оркестар на отворањето на фестивалот од 19 часот, а најавени се и гости како изненадување.
„Знам дека овој настан го следи млада публика, но откако пред неколку години со поголем интензитет настапувам, навикнат сум да гледам и млади пред мене додека пеам. Секако, моите песни се за сите генерации. Ја сакам штипската публика, со неа имам посебна поврзаност, иако на фестивалот Макфест имам пеено само еднаш. Во 1987 настапив со песната ‘Те љубам‘“, ни рече Мијалковски.
„Фолтин“, „Буч Кесиди“, „Архангел“ и диџеј Флудер настапуваат истата вечер на главната бина. На другата бина „Москито“ се диџеј Мана, „Кем“, „Паркети“, „Љубојна“ и Пијан Славеј.
„Предвидуваме хуманитарни билети, дали тоа ќе бидат индивидуални или собрани групно во износ од 1.500 денари, сите средства ќе бидат наменети за настраданите во Кочани“, вели Катерина Евго од фестивалската продукција на Д Фестивал.
На 5 јули од 19 часот ќе свират „Мизар“, Томи Кеш, „Систерс оф мерси“, „С.А.Р.С.“ и Кирил Џајковски. На 6 јули фестивалот ќе заврши со настапите на Дина Јашари, „Инер сиркл“, „Соулфлај“ и хрватскиот рок бенд „Прљаво казалиште“.
Наизменично ќе оди програмата на другата, помала бина. В сабота ќе настапат Д.Ј.К., Гвас, „Последен удар“ и Принцес Донацу, а в недела Моира, Никартик, Матеј Фолц и „Доуп куќата“.
Евго додава дека трите дена во Штип ќе има и посебна забавна програма и преку ден. На три локации во градот во три кафулиња ќе има целодневна диџеј и диско забава.
Со Битолскиот камерен оркестар Мијалковски пееше лани на концертот на Ѓоко Танески во Античкиот театар во Охрид. Во април 2024, легендарниот пејач одржа два концерта во Операта со ревиски оркестар како прослава на 60 години на сцената, а на оваа идеја се сетија радио „Буба мара“ и неговиот сопственик Ранко Петровиќ. Истата година, тој на „Златна бубамара на популарноста“ доби награда за трајни музички вредности.
М. ЏАРОВСКА
Фото: К. ПОПОВ
