Утре (21 август) август во 20 часот во Чифте амам, објект на Националната галерија на Македонија (НГМ), ќе се отвори ретроспективна изложба на уметницата и професорка Жанета Вангели. Кураторка на проектот е виш кустос Маја Крстевска, а стручен соработник, кустос Горанчо Ѓорѓиевски.
Вангели активно твори и учествува на македонската ликовна сцена од средината на 1980-тите па до денес.
„Внесувајќи нови и радикални промени во визуелниот хоризонт на овие простори, со ова ретроспективно претставување, таа одново го актуализира прашањето за релевантноста на ликовниот говор низ тропите на современата уметничка агора.
Ретроспективниот проект/концепт ‘Архив 2, 1985–2025: Епифанија’ е втор дел од творечкиот опус на Вангели претставен во Музејот на современата уметност (МСУ) Скопје (2017).
Како резиме на творештвото од четири декади, проектот ‘ Архив 2, 1985–2025: Епифанија’ ги претставува ликовните настојувања во континуитет на креативниот процес, осветлувајќи ја естетската линија во поширокиот ликовно-естетски, културно-антрополошки и општествено-политички контекст“, стои во текстот од Натали Рајчиновска-Павлеска.
Изложбата ќе биде поставена до 14 септември.
