Влатко Стефановски ќе добие награда за особен придонес во хрватската музика на 33. доделување на најважните хрватски музички награди „Порин“. Настанот ќе се одржи на 27 март во салата „Грипе“ во Сплит.
„Оваа награда го препознава неговиот исклучителен уметнички опус кој ја обликуваше регионалната музичка сцена, вклучително и хрватскиот културен простор. Стефановски е уметник чие творештво ги надминува границите на една средина. Неговите музички јазик, авторитет и креативна доследност оставија силен белег во бројни соработки, меѓу кои Хрватска зазема посебно место. Во текот на повеќедецениската кариера изгради автентичен и препознатлив музички израз во кој природно се испреплетуваат етно-џезот, инструменталниот рок, џез-фјужн и блузот, силно проткаени со традиционалните македонски ритми. Токму овој уникатен спој го направи симбол на македонската музичка култура и еден од најценети гитаристи на меѓународно ниво“, велат од „Кроација рекордс“, соработниците на Стефановски.
Оттаму додаваат дека е симболично што „Порин“ за посебен придонес следува по објавувањето на албумот на кој Стефановски свири десет евергрини на хрватскиот хитмејкер Ѓорѓе Новковиќ, снимени со Лондонската филхармонија.
Оваа награда претходно ја имаат добиено „Ролинг стоунс“, „Пинк флојд“, Роби Вилијамс, Горан Бреговиќ, Ерик Клептон и други светски познати музичари.
Фото: К. Попов
