Американската пејачка, текстописец, актерка и филантропка Доли Партон, позната како кралицата на кантри музиката, почина вчера (25 август) на 80 години. Таа зад себе остави богата кариера и песни кои со децении ги поврзуваа кантри и поп-музиката.
Партон пораснала во сиромашно семејство во Тенеси како едно од 12 деца, а токму детството било инспирација за една од нејзините најлични песни, „Палто од многу бои“ (Coat of Many Colors) од 1971. Во неа пеела за палтото што мајка ѝ го сошила од разнобојни парчиња ткаенина и за богатството што го наоѓала во семејната љубов и покрај сиромаштијата.
Еден од нејзините најголеми хитови е „Џолин“ (Jolene) од 1973, инспириран од љубомората кон црвенокоса банкарска службеничка која флертувала со нејзиниот сопруг Карл Дин. Песната стана светски кантри-класик, а низ годините доби бројни преработки, меѓу кои и верзијата на Бијонсе од 2024.
Партон е авторка и на „Секогаш ќе те сакам“ (I Will Always Love You), која ја напишала како збогување со својот музички ментор Портер Вагонер. Песната подоцна доживеа огромен светски успех во изведба на Витни Хјустон за филмот „Телохранител“ од 1992.
Со „Од 9 до 5“ (9 to 5) од 1980, напишана за истоимениот филм, во кој глумеше со Џејн Фонда и Лили Томлин, Партон дополнително ја зацврсти популарноста надвор од кантри-сцената. Песната, посветена на секојдневието и борбата на вработените жени, ѝ донесе две награди Греми.
Меѓу нејзините најпознати песни останува и дуетот „Острови во потокот“ (Islands in the Stream) со Кени Роџерс од 1983, напишан од браќата Гиб од „Би Џис“. Песната истовремено се искачи на врвот на кантри и поп-листите и стана еден од најпознатите дуети во американската музика.
Во кариерата долга повеќе од шест децении, Партон остана препознатлива по своите глас, хумор и песни за љубовта, загубата, сиромаштијата, женската сила и верата.
