Фестивалот Макфест по 41. пат ќе се одржи на 30 и 31 октомври во Домот на културата „Ацо Шопов“ во Штип. Организаторите најавуваат нови песни во различни музички стилови, познати автори и пејачи, како и млади музичари.
Меѓу авторите на годинашните песни се Ристо Самарџиев, Хари Котларовски, Огнен Неделковски, Лазар Цветковски, Раде Врчаковски-Врчак, Александар Масевски, Кристијан Габроски, Иван Јованов, Роберт Билбилов, Андријана Јаневска, Давор Јордановски, Елвир Мекиќ, Димитар Андоновски и Јован Јованов.
„Годинава имаме навистина интересен избор на автори, докажани автори со свој препознатлив стил и песни зад кои стои големо искуство. Очекувам и ова издание да донесе убави, певливи песни со различен карактер, од оние што лесно влегуваат во уво до песни кои ќе се слушаат и после фестивалските вечери. Тоа е и убавината на Макфест“, вели Роберт Саздов, уметнички директор на фестивалот.
Минатата година, Макфест прослави 40-годишен јубилеј со две фестивалски и една ревијална вечер, на која настапија легендарните пејачи кои испеаја дел од големите хитови на фестивалот.
Фото: Од ланскиот настап на Никола Јанков-Коки
