Елисејски полиња (Шанз-елизе) често се нарекува „најубавата авенија на светот“, но таа веќе не е она што беше. Таа се наоѓа во еден од најзагадените делови на градот и парижаните сѐ повеќе ја избегнуваат.
Лидерите на локалната заедница сега открија амбициозен проект од 250 милиони евра кој на три километри долгата улица треба да ѝ врати барем дел од старата слава.
![](https://smart.sdk.mk/wp-content/uploads/2019/12/7680-683x410.jpg)
„Иако често се нарекува најубавата авенија на светот, ние кои работиме овдека секој ден не сме сигурни во тоа. Елисејски полиња има сѐ повеќе и повеќе посетители и големи брендови се тепаат да бидат тука, но на локалните луѓе, таа им изгледа истрошено. Последен пат беше реновирана пред 25 години и мора да ја модернизираме и внесеме во 21. век“, вели Жан-Ноел Рајнхарт, претседател на комитетот „Шанз-елизе“.
Шанз-елизе го добила ова име во 1709 година и до крајот на векот станала популарно место за прошетки и пикници, а подоцна и за национални прослави.
Истражувањата покажуваат дека околу 100.000 пешаци дневно поминуваат по улицата и од нив, 72% се странски туристи. Осумте ленти од коловозот, пак, ги користат 3.000 возила на час, па во улицата е позагадено отколку на високопрометната обиколница на периферијата.
Новиот проект предвидува намалување на просторот за возилата за половина, тунели од дрвја и поестетско користење на комерцијални простори.
„Сакаме и натаму да ни доаѓаат туристи, но сакаме и парижаните да ја користат улицата како пред 100 години“, додаде Рајнхарт.