Архитектите, дизајнерите и изведувачите на проектот „Лахта” во Санкт Петербург, највисоката зграда во Европа со 462 метри, објавија повеќе фотографии од неа, откривајќи дека таа е речиси завршена. Изградбата на 13. највисок објект во светот беше готова во јуни, а 87-те спрата во моментов се опремени.
Според инвеститорите, руската компанија за гас „Гаспром“, „Лахта“ е најсеверниот облакодер во светот. Се наоѓа на девет километри од центарот на Санкт Петербург, на брегот на заливот на Финска. Британскиот архитект Тони Кетл ја дизајнираше кулата, пред да го предаде проектот на руските архитекти од „Горпроџект“ да го завршат.
Кетл вели дека бил инспириран од катедралата „Петар и Павле“ во Санкт Петербург кога го дизајнирал облакодерот, кој е формиран од пет кули кои се заострени околу кружното јадро што се намалува.
„Сакав да се создаде нешто што е светло и елегантно како историските форми и да ги лови промените на дневната светлина на сличен начин како златните куполи на катедралата“, рече тој.
Палубата за набљудување ќе биде лоцирана на точка од 360 метри, а се најавува дека ресторанот ќе биде најголемиот панорамски ресторан во Европа.
