„Тушек“, малиот словенечки производител на суперавтомобили, се појави во 2012 година со купето „реноватио Т500“ со 450 коњски сили. Седум години подоцна, тој се враќа со двојно помоќен производ, „ТС 900 Х апекс“, кој ќе има светска премиера во Велика Британија следниот месец.
Како што му кажува и името, новиот „тушек“ развива повеќе од 900 коњски сили, поточно 950, благодарение на 4,2-литарски В8 и два електрични мотора. До 100 километри на час тој забрзува за 2,5 секунди и од компанијата тврдат дека максимално може да развие 377 км/час. Засега нема информации кога ќе се најде во продажба и по која цена, но се шпекулира дека ќе чини најмалку 300.000 евра.
„Во изминатите години интензивно развивавме и конструиравме напредни технолошки солуции за нашиот нов модел, особено во областа на електричниот погон. Тие сега се вклучени во нашиот последен модел и успешно беа тестирани на тркачка патека“, изјави основачот на компанијата, Аљоша Тушек.
