Швајцарската гарда на Ватикан, миниармија која помага во заштита на папата, ќе има изладени глави, откако ги замени античките метални шлемови со нови, изработени со 3-Д печатење. Новите шлемови изработени од термопластика им беа дадени на војниците на 513-годишнината од основањето на гардата, соопшти Ватикан.
„Една од главните предности на новите шлемови е што нема да се загреваат како претходните, што значи дека војниците помалку ќе се потат“, изјави портпаролот Урс Бритенмосер.
Според швајцарските медиуми, старите шлемови биле изработени во Австрија и тежеле два килограми, додека новите, кои се швајцарски производ, имаат 570 грама.
Швајцарската гарда, која брои околу 110 мажи, носи свечени униформи со жолти, црвени и бели линии на официјални појавувања на папата, како при посети од државници.
