Прославеното париско кабаре „Мулен руж“ конечно ќе продолжи со работа во септември, по најдолгото затворање во последните 100 години. Првиот кан-кан во пост-пандемијата ќе се игра на 10 септември и датумот беше откриен од 12 танчарки пред „Мулен руж“.
„Многу сум среќна. Убаво е што конечно добивме датум. Очајно сакаме повторно да ја видиме публиката. Првиот кан-кан по враќањето ќе биде нешто посебно“, изјави 32-годишната танчарка Матилда Тутијо.
Како и останатите 60 членки на трупата, и таа беше принудена да вежба сама дома за време на затворањето. „Мулен руж“ не работи од 12 март минатата година, што му е најдолго затворање од пожарот во 1915 година.
„Мулен руж“ се отвори во 1889 година. Оттогаш преживеа многу животи и денес е една од омилените туристички атракции на Париз.
