Амстердам ќе ги забрани организираните тури низ „зоната на црвените фенери“, со цел да се намали бројот на туристи во историскиот центар на градот, но и бидејќи тие не покажуваат почит кон сексуалните работнички.
„Веќе е неприфатливо во ова време на сексуалните работнички да се гледа како на туристичка атракција“, изјави градскиот советник Удо Кок.
Анкетите покажуваат дека 80% од сексуалните работнички сметаат дека туристите кои зјапаат лошо влијаат врз нивната работа и градските власти дури предлагаа зоната да се пресели во друг дел од градот.
Благодарение на евтините летови и онлајн резервирањето, Амстердам, град со 850.000 жители, лани го посетиле 19 милиони туристи и се предвидува дека до 2025 година бројката ќе порасне на 29 милиони.
Забраната, која ќе опфати и платени и бесплатни тури, ќе стапи на сила на 1 јануари. Се проценува дека во „зоната на црвените фенери“ неделно се организираат над 1.000 тури, а рекордот бил 48 во еден час.
