Германскиот институт „Гете“ од Скопје донираше стотина книги на велешката библиотека „Гоце Делчев“. Тоа се дела за различна возраст и за различна читателска публика.
„Донираните книги беа набавени за Саемот на книга минатата година. По неговото завршување, одлучивме да ги подариме на некоја институција. Најголемиот број книги се за деца и млади, има белетристика и доста книги за изучување на германскиот јазик. Ги дониравме на Велешката библиотека поради нивниот проактивен однос, се јавија и покажаа интерес за збогатување на нивниот книжевен фонд“, кажа Катрин Оствалд Рихтер, директорката на Гете институтот во Скопје.
Во библиотеката има француско и англиско катче со дела отпечатени на овие два јазика, како и оддел со Брајово писмо, наменет за слепите лица и лицата со попреченост во видот.
„Библиотеката има дела на повеќе јазици, а литературата на германски беше помалубројна, затоа и се пријавивме за да го зголемиме фондот на книги на германски јазик. Во Велес има доволен број ученици кои го изучуваат германскиот јазик и затоа добиената литература ќе им биде добредојдена за подигање на знаењето“, рече Снежана Бошевска, директорката на Велешката библиотека.
Летово оваа институција доби на подарок книги од Полската и од Руската амбасада во Скопје, печатени на полски и руски јазик.
П. ПЕЧКОВ
