Од првите часови на руската инвазија на Украина, светот го обиколуваат фотографии од жени, деца и семејства како се кријат во подземната железница на Киев. Таа стана привремено живеалиште за илјадници жители на главниот град, кој повремено се ракетира и ја очекува големата руска офанзива.
Киев почна да го гради своето метро во 1949, кога сеќавањата на Втората светска војна сè уште беа свежи. Неговите 52 станици и тунели се изградени со двојна намена: за секојдневен превоз на граѓаните и како скривница ако почнат да паѓаат гранати. Но, шефот на метрото, Виктор Брагински, вели дека никогаш не верувал дека ова второто навистина ќе го доживее.
![](https://smart.sdk.mk/wp-content/uploads/2022/03/AAUwa6G-616x410.jpg)
„Сè уште не ми се верува. Сè изгледа така нереално“, вели Брагински.
Секоја станица може да послужи како засолниште за илјада луѓе од гранатите и проектилите „град“, со кои руските сили гаѓаат цели во Киев од минатата недела. Голем број луѓе може да се засолни и во мрачните тунели.
![](https://smart.sdk.mk/wp-content/uploads/2022/03/AAUvVAZ-615x410.jpg)
„Теоретски, околу 100.000 луѓе можат да се кријат во киевското метро додека имаат храна“, вели Брагински.
Некои спијат на камениот под на метрото, а некои поставија шатори. Седумдесет и петгодишната Антонина Пузиј престојува со внуците во метрото од првите ракетни напади минатиот четврток.
„Ние живееме на 12. кат и страшно е. Моите ќерки и соседи ни носат храна. Сите си помагаме“, вели таа.