Мултимедијалниот перформанс „Бакнати од сонцето“ ќе се изведе вечерва во 19 часот во Мала станица, во чест на 3 декември – Меѓународниот ден на лицата со попреченост.
Претставата е авторско дело на членовите на „Театар Пи“, Златко Митрески и Македонка Илиевска, и на актерите – лица со интелектуална попреченост од Дневниот центар „Порака“ во Скопје. Влезот е слободен.
Во перформансот, учесниците преку игра, танц и иновативно користење на проектирани видеоклипови ги презентираат своите погледи на светот, говорат за нивните потреби, но и искажуваат една универзална љубов кон актерската игра, потребата за себеизразување и кон потребата да бидат разбрани и прифатени од општеството.
Претставата „Бакнати од сонцето“ во септември се изведе на меѓународниот театарски фестивал Млад отворен театар, а од „Театар Пи“ и од „Порака“ најавуват нова креативна претстава.
