„СРЕЌНА НОВА ГОДИНА“ НА ТРИФУНОВСКИ ПРЕМИЕРНО ВО ТУРСКИ ТЕАТАР

Скопје, (СМАРТ СДК.МК)

Вечерва во 20 часот, во продукција на Турски театар, во просториите на Театар Комедија премиерно ќе се изведе претставата „Среќна Нова година“, во режија на Бојан Трифуновски, а по мотиви на Данил Хармс и Дејвид Ајвс.

В. д. директорот на Турски театар, Наџи Шабан, ја најавува „СНГ“ како мјузикл- кабаре, во кој играат Фунда Ибрахим, Несрин Таир, Зубејде Али, Емине Халил, Селпин Керим, Џенап Самет, Неат Али, Аксел Мехмет, Един Јакуповиќ и Берхеда Решит.

Режисерот вели дека ова е претстава-лабораторија за уметник кој истражува зошто светот сака да се самоуништува и затоа создава ментален простор во кој слободно размислува и твори.

„Претставата се однесува на сите дежурни виновници за распадот на оваа цивилизација“, вели Трифуновски, кој првпат режира во Турски театар.

Сценографијата е на Љупчо Јованов, костимите на Елена Вангеловска и Антонија Гугинска-Јордановска, музиката на Ади Имери, а кореографијата на Александра Кочовска-Начева.

Репризата е утревечер.

Б. НЕСТОРОСКА