Од Зоолошката градина во Скопје денеска беа избркани десет посетители кои им давале храна на животните.
Од Зоолошката информираа дека поставиле информативни табли, на кои е напишан кодексoт на однесување на посетителите. На таблите на македонски, албански и на англиски јазик е наведено дека хранењето на животните е строго забрането и дека посетителите не треба да ги допираат животните, ниту да удираат по кафезите и да ги вознемируваат. Но, и покрај предупредувањето, неколку посетители биле затекнати како им фрлаат смоки, чипс, па дури и колачи на животните.
„Освен што ќе ги отстрануваме, планираме и да воведеме казни за хранење на животните. Навистина имаме проблем. Им се дава секаков вид храна, дури и таква која е опасна за нив“, велат од Зоолошката градина.
Низ Зоолошката градина беа поставени и патокази што ќе им помагаат на посетителите полесно да се снаоѓаат каде се наоѓаат живеалиштата на животните. По 13 години, исчистено беше и езерото, кое сега е и хортикултурно уредено и поставен е брод со детски реквизити.
Во мај во Скопје се враќа шимпанзото Коко, кое се лекуваше од депресија во Холандија.
„Со Коко ќе дојдат уште три шимпанза, две женки и еден мажјак, со кои изминативе години се дружи во Холандија“, вели директорот Ѓорѓи Галетановски.
А. АНТЕВСКА
