Бред Пит ќе глуми во десеттиот и последен филм на Квентин Тарантино, насловен „Филмски критичар“ (The Movie Critic), објавија холивудските медиуми. Тоа ќе биде нивна трета соработка, по „Неславни копилиња“ и „Беше еднаш во Холивуд“, за кој Пит доби Оскар за најдобра споредна улога.
„Филмски критичар“ ќе се случува во Лос Анџелес во 1977 и ќе следи критичар кој пишува за измисленото списание „Попстар пејџис“. Тарантино откри дека ликот е заснован врз вистинска личност.
„Тој никогаш не беше познат, пишуваше рецензии за филмови за порнографски магазин. Беше многу груб, пцуеше и користеше расистички навреди. Но, неговите текстови беа многу забавни. Пишуваше за популарни филмови, но беше второкласен критичар“, кажа Тарантино.
Нејасно е кого ќе глуми Пит зашто Тарантино претходно најави дека главниот актер би имал околу 35 години.
Премиерата на „Филмски критичар“ е најавена за 2025.
