Легендарни предмети од „Сјаење“ и „2001: Одисеја во вселената“, кои го претставуваат перфекционизмот на Стенли Кјубрик, се во фокусот на новата изложба во Лондoн, посветена на големиот американски режисер.
Кураторот Дејан Суџиќ вели дека посетителите можат да се запознаат со универзумот на Кјубрик и со неговата специјална поврзаност со Велика Британија преку 700 предмети, скици, макети, филмски извадоци и интервјуа, кои го пренесуваат целиот процес на подготвување и снимање на 13-те филмови во 50-годишната кариера.
Изложбата се совпаѓа со 20-годишнината од смртта на Кјубрик и е еден вид омаж на режисерот кој се преселил во Британија во раните 1960-ти години. Тој почина во 1999 во неговата куќа во близина на Лондон.
Меѓу најславните предмети на изложбата се секирата на Џек Николсон од „Сјаење“, вознемирувачките костими од „Пеколен портокал“ (19710 и венецијанските наметка и маска на Том Круз од „Очи широко затворени“ (1999).
„Секој филм што го снимил е толку различен. Истражувал во сите жанрови, историски филм, воен, хорор, научна фантастика. Од поставката можете да ги почувствувате драмата и возбудата за филмовите кои ги снимал“, вели кураторот.
