Новиот филм со британскиот актер Том Харди, „Веном“, работен според стрип на Марвел, синоќа имаше светска премиера во Лос Анџелес, а од четврток ќе игра и во скопските кина Синеплекс и Милениум.
Харди има две улоги, антихеројот вонземјанин Веном и Еди Брок, неговото најпознато тело-домаќин. Веном е еден од најголемите непријатели на Спајдермен, но тој не се појавува во филмот.
Режисер е Рубин Флајшер, а во филмот играат и Мишел Вилијамс, Риз Ахмед и Вуди Харелсон.
„Мојот син е огромен фан на Веном и тоа беше причината што избрав да го играм ликот. Сакав да снимам нешто што тој ќе го гледа. Затоа снимив филм во кој одгризувам глави на луѓе“, вели Харди.
