ЃОКОВИЌ 311 НЕДЕЛИ Е СВЕТСКИ РЕКЕТ БРОЈ ЕДЕН, НО СÈ УШТЕ Е ДАЛЕКУ ОД РЕКОРДОТ НА ШТЕФИ ГРАФ

Белград, (АТП)

Новак Ѓоковиќ ја почна 311. недела како светски рекет број еден, со што постави нов рекорд во машкиот тенис. Тој минатиот понеделник го израмни рекордот на Роже Федерер и загарантирано е дека ќе остане на врвот на АТП-листата уште најмалку шест недели.

Српскиот тенисер првпат се искачи на врвот на 4 јули 2011, откако го совлада Жо-Вилфред Цонга во полуфиналето на Вимблдон, а потоа и ја освои титулата во дуелот со Рафаел Надал. Тој го почна петтиот престој на првата позиција на 3 февруари, а најдолгата низа во кариерата му траеше 122 недели, од јули 2014 до ноември 2016. Најниско падна во мај 2018, кога беше на 22. место.

На вечната листа после Ѓоковиќ и Федерер следуваат Пит Сампрас со 286 недели на врвот, Иван Лендл (270) и Џими Конорс (268).

„Навистина ме возбудува што одам по стапките на легендите и џиновите на овој спорт. Тоа што го заслужив моето место меѓу нив следејќи го мојот детски сон е прекрасна потврда дека сѐ е можно ако ги правиш нештата со љубов и страст“, изјави Ѓоковиќ.

Апсолутна рекордерка е Штефи Граф, која беше светски рекет број еден 377 недели, а пред Ѓоковиќ се и Мартина Навратилова со 322 и Серена Вилијамс со 319 недели.

Следната цел на Ѓоковиќ, како што најави претходно, е да го надмине рекордот на Федерер и Надал од 20 освоени гренд слем титули.