Учениците од скопската гимназија„Никола Карев“ организираат тридневен настан со апел да се поминува повеќе време со најблиските, наместо организирање на собири и новогодишни прослави. Во услови на пандемија настанот ќе биде одржан онлајн на социјалните мрежи на ученичката заедница.
„Сакаме да пренесеме порака за добро однесување и почитување на препораките и мерките од Министерството за здравство, а притоа да се покаже дека можеме да се забавуваме и на безбеден начин. И покрај лошите услови да покажеме дека сите сме заедно во оваа голема битка и малку да се забавуваме“, велат средношколците.
Настанот ќе започне на утре со хуманитарната акција во која учениците од „Карев“ ќе подарат новогодишни пакетчиња и новогодишни честитки на социјално загрозените ученици, деца и младинци.
Вториот ден ќе биде отворен со едукативни работилници на теми за менталното здравје и личен развој и турнири во игри на интернет, додека во третиот ден од настанот предвидено е поетско читање во соработка со иницијативата Култура бета и проекција на краткометражниот филм „Малечка“ од младата режисерка Ана Андонова. Настанот ќе биде заокружен со музички перформанс на три бендови од „Арт Хаус Карев“.
К. СЕЛАМОВСКА
