„Бернајс пропаганда“ во нов, проширен состав издаде нов миниалбум, чија слушачка промоција ќе се одржи денеска на пладне во „Ап(о)тека“ во Младински културен центар во Скопје.
На дружбата со публиката и со медиумите ќе се слуша албумот со три песни насловен „Ништо нема да нè раздели“, на кој, покрај стандардните членови Кристина Горовска, Васко Атанасоски и Миле Крстев, дебитираат Раде Јордановски и Кристијан Лафазановски. Презентер на промоцијата ќе биде Тошо Филиповски.
Албумот „Ништо нема да нè раздели“ излезе на 12 декември, а беше снимен во „Студио 1060“. Како гости на албумот се појавуваат Тони Китановски и култниот американски музичар Мајк Вот. За песната „Мојата Марија“ е снимен и спот, во режија на Милан Блажевски.
Ова издание е најава на новиот албум на групата, „Втора младост, трета светска војна!!!“.
