Камерниот оркестар на Битола го имаше првиот концерт во Виена, каде што изведе македонски евергрини во барокната црква „Св. Ана“. Настанот се одржа по повод 33 години независност на Македонија и беше свечено отворен од македонскиот амбасадор во Австрија, Освит Росоклија, а присуствуваа амбасадори од повеќе земји и бројни Македонци кои живеат во Виена.
Ирена Крстеска, Агни Авшар и Ристо Самарџиев ја воодушевија
публиката со изведби на безвременски македонски хитови, како „Налеј, Налеј“, „Болен ми лежи“, „Елено ќерко“, „Бор садила мома Евгенија“, „Кажи зошто ме остави“, „Љубов неверна“ и други. Аранжманите на сите песни ги подготви Владимир Димовски, кој беше и диригент на концертот.
„За нас, да гостуваме во Виена е огромна чест и привилегија. Виенската публика со својата љубов кон музиката и уметноста ни овозможи да го пренесеме духот на македонската музичка традиција на начин на кој најдобро знаеме – преку срце и душа. Ова гостување е огромен чекор за Камерниот оркестар на Битола и горди сме што можевме да бидеме дел од оваа грандиозна музичка сцена“, изјави Димовски.
