Поп-ѕвездата Кајли Миног ја најави својата најголема светска турнеја во последните десет години, како и продолжение на нејзиниот лански албум „Тензија“. Новите 13 песни од албумот „Тензија 2“ ќе бидат објавени на 18 октомври, што е нејзиното 17. студиско издание во кариерата.
„Многу сум возбудена што ќе можам да ја прославам ерата ‘Тензија‘ со фановите“, рече Миног.
Досега се потврдени 21 датум од турнејата, но Миног најави дека ќе има уште. Турнејата ќе почне во февруари во нејзината родна Австралија, по што продолжува во Азија и Велика Британија.
Педесет и шестгодишната Миног во февруари ја доби својата седма награда Греми, 20 години по првата.
(Фото: Гети)
