Кантавторката Дина Јашари го објави новиот сингл „Градот“ заедно со видеоспот, за кој вели дека го најавува нејзиниот нов звучен израз.
„‘Градот’ е интимна посвета на Скопје, што е пренесено преку визуелниот приказ на автентични локации од градот во спотот, чиј автор е Доан Акити. Дизајнот во спотот е на Васил Шемко“, велат од тимот на Јашари.
„Посветена е на сите луѓе и места, присутни и, за жал, некои од нив отсутни, кои му даваат смисла на градот“, кажа Дина Јашари за новата песна.
Во видеото се појавуваат и членовите на нејзиниот бенд Лука Тошев и Драган Теодосиев.
Текстот и музиката за „Градот“ ги напиша Јашари, аранжманот е на Тошев и Теодосиев, продукцијата е на Дина Јашари и Димитрије Марковиќ, миксот е на Драги Иванов, а мастерингот на Рој Реклис. Песната е достапна на сите дигитални платформи, а нови песни се очекуваат наскоро.
