Песна снимена за албумот на Тина Тарнер, „Приватен танчар“ (Private Dancer), за која се претпоставуваше дека е изгубена, е повторно откриена и денеска за првпат беше емитувана на Би-Би-Си радио 2. „Hot For You, Baby“ требаше да се најде на албумот, но предност им била дадена на други песни.
„Приватен танчар“ излезе во мај 1984 и се смета за почеток на второто поглавје во нејзината кариера.
Таа успеа да се извлече од проблематичниот брак со Ајк Тарнер на крајот на 1970-тите, но разводот ја остави без пари. Во тоа време, Тарнер живееше со бонови за храна и настапуваше во лошо осмислени кабаре шоуа за да си ги плати долговите.
Музичката индустрија во голема мера ја отпиша, но во Англија, таа сè уште имаше обожаватели. Во 1981, Род Стјуарт ја покани Тарнер да настапи со него во шоуто „Сабота навечер во живо“, а „Ролинг стоунс“ ја повикаа на нивната турнеја во САД.
(Фото: ЕПА)
