Пијанистот Симон Трпчески вечерва ќе го претстави музичкиот проект „Македонисимо“ во салата „Ватрослав Лисински“ во Загреб, како дел од балканската серија концерти, вели Здружението „КултурОп“.
Тие синоќа настапија во Сомбор и на 26 октомври се враќаат во Србија за гостувањето на фестивалот НОМУС во Нови Сад, а серијата ќе се заокружи во Темишвар (Романија) на 28 октомври.
Маестро Трпчески минатиот месец имаше концерти со Симфонискиот оркестар на Квебек во Канада и со Филхармонискиот оркестар на Монте Карло во Монако, рецитал во Мајнц (Германија), како и три настапи со Симфонискиот оркестар на Детроит.
„Македонисимо“ претставува спој на македонската народна музика со џезот и класичната музика, сплет од 23 нумери, најмногу ора и по некоја песна. Трпчески го создаде во соработка со композиторот Панде Шахов, а го изведува со Александар Краповски (виолина), Александар Сомов (виолончело), Хидан Мамудов (кларинет, саксофон и кавал) и Влатко Нушев (удиралки). Светската премиера на проектот беше во Германија во 2017.
Трпчески следниот месец е на турнеја во Австралија, а до крајот на годинава следат и концертите со Лондонскиот симфониски оркестар.
(Фото: СДК.МК)
