Симон Трпчески вечерва (6 март) ќе одржи концерт во Сантијаго, главниот град на Чиле. Придружуван од Филхармонискиот оркестар на Сантијаго во Градскиот театар, Трпчески ќе го свири Првиот концерт за пијано и оркестар од Чајковски. Ќе диригира чилеанско-италијанскиот маестро Паоло Бортоламеоли.
„Трпчески до крајот на месецов ќе настапи во Чикаго со тамошниот Симфониски оркестар, во чија сала три вечери ќе го свири Првиот концерт за пијано и оркестар од Рахмањинов со диригентот Јакуб Хруша. Ќе има и три настапи со Симфонискиот оркестар на Феникс, со диригентот од Венецуела, Илич Ривас“, велат од „КултурОп“.
Ривас и Трпчески во 2009 настапија и во Скопје, заедно со Младинскиот оркестар на „КултурОп“, во рамките на Скопско лето.
На почетокот на април, нашиот виртуоз на пијано ќе се врати на престижната сцена на виенскиот Музикферајн, каде што ќе биде солист на Тонкунстлер оркестарот со диригентот Доминго Хиндојан од Венецуела. Концертот ќе биде австриска премиера на „Концертот Аргентино“ од Хинастера.
До крајот на наредниот месец, Трпчески го очекуваат и рецитали во Љубљана и Сингапур.
