Њујоршкиот фестивал Лонг плеј, иако има само три изданија, прерасна во еден од најзначајните настани за промоција на нова современа музика во светот. Годинешното трето издание на Лонг плеј понуди над 60 концерти на нова одлична музика, во еден долг викенд, на повеќе места во Бруклин, сите на непосредна близина едно од друго.
„За наша среќа, годинешниот фестивал Лог плеј е преплавен со сите различни видови музика и музичари – музика која е гласна и мека, музика која е движечка и медитативна, музика која е за да размрда и за да опушти. Музика која е предизвик за тоа од каде дојдовме и дава мапа каде одиме“, велат организаторите Мајкл Гордон, Девид Ланг и Џулија Волф, уметнички директори на „Бенг он а кен“, која од мал колектив порасна во џиновска меѓународна организација посветена на поддршката на експерименталната музика, каде и да се наоѓа.
На Лонг плеј изминатиот долг викенд настапија 50-тина музичари и состави – од глобални ѕвезди како Пети Смит до легенди на современата класична музика како Дејвид Рајш. Фокусот е на нова музика без оглед на жанрот, со акцент на современа класична и џез.
Големиот настан првата вечер беше Пети Смит со Саундвок колектив – експериментална музика во срцето на Бруклин, но вистинска ѕвезда на вечерта беше концертот на татковците на њујоршката современа авангарда „Бенг он а кен ол старс“, кои се и организатори на фестивалот.
Следниот ден флукскит секстетот на Дариус Џонс имаше искрен настап на ветеранот на саксофон со неговиот бенд.
Новонарачана современа опера „Големата опера на јидиш речникот“ од Алекс Вајзер и Бен Каплан беше изведена во Месна заедница, но наиде на извонреден прием, иако стануваше збор само за концертен рецитал на оперската музика.
Ребека Хелер на фагот претстави светска премиера на новото дело на Стив Рајш „Контрапоинт на Гренд стрит“ и композиција од Џулиус Истман. Маестралната изведба беше пречекано многу топло, а и композиторот беше во публиката.
Енергичната Клеар Чејс на флејта свиреше и едно дело инспирирано од поезијата на македонскиот поет Никола Маџиров, најавувајќи го и него во настапот.
Легендата на електронската музика Џеф Милс беше ѕвезда на втората вечер со музика од албумот „Утре доаѓа жетвата“. Флејтистката Рашида Али, пијанистката Кетлин Супове и перкусионистот Сундиата му се придружија и го трансформираа електронскиот звук во таписерија на експериментални, но емотивни инспирации.
Сем Прекоп и Џон Мекинтајр настапија во супер-хипстерскиот бар „Паблик рекордс“. Електронската музика дишеше на рачно направените звучници.
Исклучително инспириран сет малку подоцна имаше трубачот Пол Мазурек со тапанарот Чед Тејлор, настапувајќи под името „Чикаго андерграунд дуо“. Мазурек, кој има настапувано и на Скопскиот џез фестивал, и Тејлор свиреа во интимно студио, окружени со публиката која стоеше. Настапот беше мајсторски, но исполнет со емоција.
Милвос квартетот имаше два концерти – обата беа сензационално добро отсвирени, со различен репертоар во кој имаше и премиерни дела, нарачани од Милвос.
Големото финале ги оправда очекувањата. Во големата сала на Бруклинската музичка академија, „Бенг он а кен ол старс“ ја изведе нивната верзија на легендарното дело на Стив Рајш „Музика за 18 музичари“. Хипнотичко дело во перфекционистичка изведба.
Фото: Големиот настан првата вечер беше Пети Смит со Саундвок колектив (Фото: Џ. Сервантес)
