На 8 и 9 маj во Театар Комедија ќе има премиери на претставата „Вистината“, по текст на францускиот драмски писател Флоријан Зелер, во режија на словенечкиот режисер и актер Владимир Јурц.
Двата дена ќе играат различни актерски екипи: Благица Трпковска-Јоковиќ, Кристина Христова-Николова, Роберт Ристов и Александар Вељановски, Тања Мицков, Ева Скендеровска, Столе Мицов и Виктор Арсов. Костимографка е Маја Благович, а композитор Васко Атанасовски. Преводот е на Офелија Ковилоска.
„Две актерски екипи, една приказна и најмалку две вистини. Дали добронамерната, бела лага може да ни ги спаси пријателството и бракот? Конечно, дали воопшто можеме да разговараме за некаква апсолутна вистина кога станува збор за љубов? Одговорите на овие скокотливи прашања, испреплетени низ современиот, иронично-комичен, но и сурово реалистичен ракопис пристигнаа и кај нас“, велат од Комедија.
Зелер е француски романсиер, драмски писател, сценарист и театарски и филмски режисер. Има напишано повеќе од десет драми поставени низ целиот свет, кои го прават еден од најпознатите современи драматурзи.
(Фото: Театар Комедија)
