На 5 април во скопскиот Драмски театар ќе се одржи премиерата на претставата „Ифигенија за ништо“, во режија на Филип Петковски.
Претставата е современа адаптација на античката трагедија на Еврипид за семејство кое решава да го жртува животот на својата ќерка. Актерката Нина Елзесер на прес-конференцијата денеска во Драмски театар рече дека претставата се игра во вистинско време.
„Ифигенија, девојката која ја играм, е незаинтересирана за системот од кој и самата е дел, незаинтересирана е да остави потомство. Но, тоа не е од никаде, тоа секогаш доаѓа од семејството. Нејзиниот татко никогаш не погледнал подалеку од своите амбиции и на крајот од денот, што се очекува од една девојка која е така растена. Ние преку говорот на телото, без многу зборување, требаше да кажеме многу за системот во кој живееме и кога зборувам за системот не мислам само на Македонија. Ова е многу точно време за одржување на оваа претстава, гледајќи го она што се случува во Србија, Грција, Турција, Газа и низ целиот свет. Како човештво имаме многу потфрлено, сите сме виновни“, кажа Елзесер.
Во претставата играат и Димитрија Доксевски, Филип Трајковиќ, Јелена Жугиќ, Стефан Вујисиќ, Сара Климоска, Томислав Давидовски, Ивана Павлаковиќ, Ања Митиќ, Јована Спасиќ, Александра Павлова-Бубања и Јована Миладинова.
Директорот на Драмски театар Роберт Вељановски кажа дека во изминативе 60 години театарот во континуитет нуди квалитетни актери и претстави.
Димитрија Доксевски, кој го игра Агамемнон, таткото на Ифигенија, рече дека актерите имале сериозни физички подготовки по еден час на ден. Сара Климоска кажа дека екипата е многу компактна и дека ѝ е драго што оваа претстава посветено се подготвувала.
Пробите почнаа во февруари годинава. Адаптацијата е на Филип Петковски, кој рече дека претставата поради непријатните сцени и еротиката не се препорачува за помлади од 16 години. Ова е една од петте претстави за кои годинава Драмски доби буџет од Министерството за култура – 850.000 денари.
М. ЏАРОВСКА
