Модната дизајнерка Ивана Кнез прослави 15 години работа со нејзината ревија „Да живее драмата“ (Viva La Drama) во рамките на Скопскиот моден фестивал.
Модниот фестивал почна сношти и ќе трае до 6 април во трговскиот центар „Дајмонд“.
Ивана Кнез прикажа оригинални креации на богато модно шоу кое гостите го проследија носејќи маски, а маската беше заштитен знак на дел од нејзините претходни креации.
„Инспирирана сум од пет култни филма кои влијаеја врз создавањето на тоа што сум, култни филмови кои до денес менуваат животи. Ја посветувам на моите најмили, на оние кои ме поддржаа без разлика на сѐ што се случи изминативе 15 години. Наменета е за жени кои не се плашат да живеат, не се вклопуваат во туѓи критериуми и имаат храброст да бидат свои“, ни рече Кнез.
Специјална гостинка меѓу моделите беше поп-пејачката Бојана Скендеровски, која соработува со Ивана Кнез и испеа песна од Кристина Агилера.
За време на модниот настан се прикажа кус моден филм во кој учестуваат Сергеј Варошлија, Моника Црнокрак, Иван Наумовски, Калтрина Круезиу, Октај Сејди и Сара Дамчевска.
Од агенцијата „Макс менаџмент“, која е организатор на настанот, велат дека изминативе три години учествувале над 60 дизајнери, брендови и академии.
М. ЏАРОВСКА
