ТЕНИСКАТА ЅВЕЗДА МУГУРУСА ЌЕ СЕ МАЖИ ЗА ФАН КОЈ НА УЛИЦА ПОБАРАЛ СЕЛФИ СО НЕА

Мадрид, (Пипл)

Шпанската тениска ѕвезда Гарбиње Мугуруса објави дека се свршила со своето момче Артур Борхес и дека подготвуваат свадба. Тоа е среќно продолжение на врската која почна по нивната случајна прва средба во њујоршкиот Сентрал Парк во 2021, додека 29-годишната Мугуруса настапуваше на Отвореното првенство на САД.

Поранешната шампионка на Ролан Гарос и Вимблдон и шпанскиот модел се запознале кога тој побарал селфи со неа.

„Мојот хотел беше блиску до Сентрал Парк и еднаш ми беше здодевно, па одлучив да прошетам. Излегов и налетав на него. Наеднаш, побара да се сликаме и ми посака среќа на Ју-Ес опен. По таа прва средба, се договоривме заедно да прошетаме во паркот и така почна нашата љубовна приказна“, раскажа Мугуруса за шпанското списание „ХОЛА!“.

Таа вели дека свадбата ќе се одржи во Шпанија, некаде покрај плажа.

Мугуруса, која беше и светски рекет број еден, минатиот септември објави дека зема пауза од тенисот на неодредено време.