„ТРИ МАРИИ“ НЕ Е ФЕМИНИСТИЧКИ, ТУКУ ЧОВЕЧКИ РОМАН ЗА ЉУБОВТА, ВЕЛИ ОЛИВЕРА ЌОРВЕЗИРОСКА ЗА НОВАТА КНИГА

Скопје, (СМАРТ СДК.МК)

„Три Марии“, иако е роман за три жени, сепак не е феминистички роман, рече писателката Оливера Ќорвезироска на синоќешната (2 април) промоција на нејзиниот трет роман во книжарницата „Литература.мк“.

Со промоцијата на книгата, која е издание на „Арс Либрис“, дел од „Арс Ламина – публикации“, беше отворено второто издание на фестивалот за литература и општа култура „Видик“, кој е во организација на „Литература.мк“. Промоторка на книгата беше Илина Јакимовска, а извадоци прочитаа актерките Катерина Коцевска (во улогата на Марија Пребирлиева), Биљана Драгиќевиќ-Пројковска (како Марија Зара) и Симона Димковска (како Марија Деспотовска-Солев).

Јакимовска, Ќорвезироска, Коцевска, Драгиќевиќ-Пројковска и Димковска на промоцијата. (Фото: „Арс Ламина“)

„Во романот не се занимавам со тоа кој чисти по дома и кој работи сѐ, а кој се излежува или се шета, како партнерите си ги распределуваат обврските дома. Тоа не ме интересира и не ми е возбудливо книжевно. Она што ме интересира во оваа книга се длабоките емотивни врски што си ги оставаат партнерите на себе, тоа што го наследиле како несреќа, бидејќи сметам дека несреќата и траумата се наследуваат во семејствата и низ генерациите. Изборите и судбините доаѓаат како наследство. Во ова дело се занимавам со врските помеѓу мажите и жените, дали љубовта боли кога ја нема и каква е таа физичка болка. Ова е роман за нови почетоци. Трите Марии се обидуваат да почнат нов живот, првите две Марии се обидуваат и не успеваат, а третата Марија можеби ќе направи нов избор. Мораше да има и малку оптимизам“, кажа Ќорвезироска.

„Три Марии“ е нејзин трет роман за возрасни, по „Заклученото тело на Лу“ и „Аб’т“. Издавачот вели дека тој е внимателно осмислен омаж на Славко Јаневски, но не е класична посвета, ниту римејк на конкретно дело.

(Фото: „Арс Ламина“)