Играорците од македонскиот ансамбл за народни песни и ора „Танец“ синоќа ја загреаја публиката во ВИП арената „Борис Трајковски“ во Скопје, пред светската танцова атракција „Огнот од Анадолија“ од Турција.
Веселата атмосфера со аплаузи и овации продолжи во текот на целото двочасовно шоу, кое е комбинација на турската култура и народните ора од различни подрачја на Турција, како и современ танц, балет и акробации.
Облечени во костими со шарени и силни бои, танчарите со синхронизираните движења, надополнети со визуелните ефекти, ја орасположија публиката, која аплаудираше во ритамот на веселата и игрива музика.
„Огнот од Анадолија“ се Гинисови рекордери во две категории: најбрзо изигран танц (241 чекор во минута) и шоу пред најбројна публика – 40.000 во Турција.
Светски познатата трупа, која низ светот настапува од 2002 година, ја сочинуваат 120 играчи и повеќе кореографи, а во Скопје, како и во земјите од регионот, настапија околу 60 танчари.
Настапот на „Огнот од Анадолија“ го организираше „Прагма мјузик ентертејнмент“.
