Вечерва (8 мај) на Малата сцена во велешкиот театар „Јордан Хаџи Константинов-Џинот“ премиерно ќе се изведе претставата „Затворенички“, во режија на Елеонора Теова. Создадена како колективно авторство, претставата носи на сцена три жени, три различни приказни, три борби за опстанок.
„Во општество во кое вестите за фемицид и насилство врз жените стануваат застрашувачко секојдневие, претставата ‘Затворенички’ не нуди утеха, туку соочување. Борба на три силни жени, но оттурнати. Оставени без поддршка, без заштита, без систем што ќе застане зад нив. Тие се принудени сами да ја преземат контролата врз сопствениот живот, по цена што ги доведува зад решетки. Но, затворот не е крај, тој е продолжение. Во затворскиот простор, насилството не исчезнува, само ја менува формата“, вели Теова.
Во претставата играат Сандра Танчева, Јанка Лефкова и Димитрина Мицкоска. Костимографка е Катерина Чукниева, а сценографијата е на Филип Коруновски. Сценските движења и кореографијата се на Кренаре Невзати Кери, а автор на музиката е Сашко Костов.
П. ПЕЧКОВ
