Камерниот оркестар на Македонската филхармонија ќе гостува во Казахстан, каде што ќе одржи два концерти во Алмати (5 септември) и Астана (7 септември). На концертите ќе диригира Борјан Цанев, а како солист ќе настапи концерт-мајсторот на Филхармонијата, Анна Кондратенко.
Музичарите ќе ги изведат „Дивертименто“ од Моцарт, свитата „Холберг“ од Григ, избор од двете дела „Четири годишни времиња“ од Вивалди и Пјацола, како и македонското дело „Капричо“ од Драган Шуплевски.
„Ми претставува чест и задоволство што со напорната работа во едногодишниот период и со нашето внимание кон презентација на Македонската филхармонија надвор од границите на нашата држава ќе се претставиме во Казахстан за првпат“, вели директорот на Филхармонијата, Виктор Илиески.
